Со комеморација францускиот претседател Франсоа Оланд го започна одбележување на првата годишнина од терористичките напади во Париз откривајќи спомен плоча во чест на мажот кој загина во самоубиствениот бомбашки напад на стадионот крај француската престолнина.
Мануел Диаз загина пред националниот стадион „Stade de France“ на кој во тој момент се играше пријателскиот фудбалски натпревар меѓу селекциите на Франција и Германија, во првиот од низата напади вечерта на 13-ти ноември 2015 година, во кој загинаа вкупно 130 луѓе.
Францускиот претседател Франсоа Оланд и париската градоначалничка открија спомен плочи на кафулињата и рестораните во монденскиот центар на Париз во кој напаѓачите чија припадност ја потврди ултрарадикалната сунитска организација Исламска држава, стрелаа врз луѓето кои уживаа во вечерното излегување тој петок.
Главната свеченост ќе се одржи во „Батаклан“, концертната сала во којашто тројца напаѓачи убија 90 луѓе во текот на настапот на американската рок група Eagles of Death Metal. Британската музичка ѕвезда Стинг вчера таму одржа концерт со што повторно ја отвори салата. На распродадениот концерт присуствувале и многумина преживеани на нападот. Меѓу нив бил и Орелјен.
„Нема да ги заборавиме. Денеска имаме две задачи: прво да се потсетиме на оние кои ги загубија животите во нападот, а потоа да ги славиме животот и музиката во ова историско време“, ѝ се обрати Стинг на публиката на француски јазик, откако со минута молк им беше одадена почест на жртвите.
Францускиот премиер Мануел Валс во напис објавен во најтиражните европски дневни весници вети дека исламскиот тероризам ќе биде поразен еднаш засекогаш.
„Тероризмот повторно ќе нападне во Европа“, предупреди, „но имаме сила и сето што ни е потребно да го победиме“, напиша. Додаде дека вонредната состојба воведена по париските напади веројатно ќе биде продолжена. Вонредните мерки се неопходни „за да се заштити демократијата“, истакнува Валс.
Франција е дел од меѓународната коалиција која се бори против џихадистичката Исламска држава во Ирак и во Сирија. Во земјата и натаму е вонредната состојба, а тероризмот и улогата на исламот се клучни теми на дебатите шест месеци пред одржувањето на претседателските избори.