Една жртва и голема материјална штета е епилогот од циклонот „Бранко“ кој синоќа ги зафати Србија и Босна и Херцеговина. Жена се удавила во надојдените води во бањата Ковиљача.
Обилните дождови, проследени со силни ветрови и грмотевици го парализираа сообраќајот, оставија без струја неколку градови во централна и јужна Србија, а во повеќе делови се забележани свлечишта, а најпогодена е Лозница, каде е прогласена вонредна состојба.
Поради излевање на реката Штира, евакуирани се болните и вработените од здравствениот дом, каде водата достигнала над еден метар. И денеска е вклучен црвениот метео-аларм.
Циклонот „Бранко“ го погоди и кантонот Тузла во Босна и Херцеговина. Најкритично е во источните и северните делови од државата каде е прогласена портокалова фаза на опасност. Мостар без струја останал час и половина, а поради одрони на патиштата во прекин е сообраќајот на неколку патни правци.
Дождовите и силното невреме ќе се задржи и денеска, а властите предупредуваат дека е можна уште поголема катастрофа од онаа во мај. И по повеќе од два месеци од оваа катастрофа, проблемите на луѓето погодени со поплавите се уште не е решен.
Неколку десетици луѓе ноќта ја поминале во шатори пред општината Жепче, која беше една од најпогодените во мајските поплави, со барање куќите да им се обноват до почетокот на зимата.
– Јас сум болна жена а ја минав ноќта тука, и до сега никој не ни се обратил. Ова е срамота, изјави жител на општина Жепче.
Протестираат и жителите на Обреновац кои се незадоволни од распределбата на финансиската помош за санирање на штетите.
– Категоризацијата е основен проблем. Сите се фотографираа со Обреновац како најпогодено подрачје, а сега ни даваат помош од трета категорија, изјави жител на Обреновац.
Метеоролозите предвидуваат дека регионот ќе биде под влијание на овој циклон уште неколку дена.