Од Европската комисија (ЕК) не сакаат да ги коментираат можните причини за истекувања на гас од „Северен тек 1“ и „Северен тек 2“, уверувајќи дека снабдувањето е безбедно за Европа, јави дописничката на МИА од Брисел.
На денешниот редовен брифинг за новинари, портпаролите на ЕК порачаа дека се информирани за инцидентот со трите истекувања на гас од „Северен тек 1“ и „Северен тек 2“ во близина на Данска и се во постојан контакт со засегнатите земји членки.
„Во моментов нема последици врз сигурноста на снабдување, затоа што испораките од „Северен тек 1“ се на нула, а „Северен тек 2“ нема дозвола за сега“, изјави портпаролот за енергетика, Тим Мекфи.
ЕК, исто така, ги следи последиците врз загадувањето на воздухот и климатските промени, бидејќи истекувањето на метан може негативно да влијае врз нив.
Во меѓувреме Данска прогласи забрана за навигација околу местото на инцидентот.
Но, од ЕК не се шпекулира за можните причини, од кои една може да биде саботажа од руска страна, нешто што не го исклучи данската Влада.
„Не шпекулираме дали е саботажа или не. Немаме елементи да одредиме која е причината за истекувањето, но се разбира дека доколку е саботажа, секој акт на саботажа врз инфраструктура ќе биде осуден“, изјави главниот портпарол на ЕК, Ерик Мамер.