Надворешен експерт обезбеден од производителот на опремата за следење на телекомуникации денеска ги одзема податоците од помошните сервери, согласно судската наредба, соопштуваат од Јавното обвинителство за гонење кривични дела кои произлегуваат од содржината на незаконското следење на комуникациите.
„Во текот на денешниот ден, со помош на надворешен експерт обезбеден од производителот на помошните сервери кои се во сопственост на телекомуникациските оператори, а физички се наоѓаат во Управата за безбедност и контраразузнавање, беше извршено одземање на сите податоци од помошните сервери согласно судската наредба. Појаснуваме дека предметот е во предистражна постапка и во овој момент не сме во можност да обезбедиме дополнителни информации. Одземените податоци ќе бидат предмет на анализа и нашите наоѓања ќе бидат благовремено споделени со јавноста.
Сакаме да појасниме дека спроведувањето на судската наредба од страна на надворешниот експерт беше овозможено од Директорот на Управата за безбедност и контраразузнавање, а дополнителни гаранции беа дадени и од Министерот за внатрешни работи“, соопштуваат од ОЈО.
Експертот од Ериксон се чекаше да пристигне повеќе од една недела, додека софтверот во УБК беше под обезбедување и надзор на МВР.