Од 900 до 1.000 смртни случаи се резултат на зголемената аерозагаденост во земјава, а Македонија е петта во Европа по стапка на смртност од загаденоста на воздухот преку ПМ10 честичките, алармираат експертите од ова поле.
Во пораст се и малигните болести, и тоа велат познавачите на проблемот, треба што поскоро да се среди со долгорочни и краткорочни мерки во сите сектори.
– Кога е највисока аерозагаденоста и кога се ниски температурите тогаш доаѓа и врвот на бројот на смртни случаи кај постарите или хронично болните. Мерките за намалување на загаденоста се интра-секторски. Урбанистичкото планирање треба да биде такво да еколошкиот елемент биде важен, што кај нас не е така. Над 90 отсто од возилата во Македонија, во Европа не би ги прифатиле бидејќи користат еколошки необработливо гориво. Потребно е да се внимава и на начинот на кој се греат луѓето во зима. Треба синхронизирана акција, вели Драган Ѓорѓев од Институтот за јавно здравје.
Тој дополнува дека се потребни низа трибини и кампањи за да се зголеми свеста кај граѓаните, за да сфатат дека тие имаат огромен удел во загаденоста на воздухот.
Професорот Трајче Стафилов од Институтот за хемија на Природно – математичкиот факултет, вели најголеми извори на загадување претставува индустријата, а особено согорувањето на горивата.
– Најголемиот удел е од согорувањата во домаќинствата и индустриските објекти. Можните решенија треба да бидат долгорочни од градските органи на ниво на држава како и Владата, за да се намали ваквата состојба, вели Стафилов.
Според него, и покрај тоа што некои проекти за решавање на проблемот се скапи, од некаде сепак мора да се почне.
Тој алармира дека потребни се и краткорочни мерки, особено од политичарите, за кои вели, треба да бидат похрабри кога се работи за овој горлив проблем, бидејќи е во интерес на граѓаните.
Стафилов вели меѓу нив, потребни се мерки за редуцирање на сообраќајот и за бесплатен превоз во јавниот транспорт.
Инаку Бугарија, Србија, Црна Гора, Романија и Унгарија, се земјите каде што загадувањето е поголемо од Македонија.
Ѓорѓев и Стафилов денеска беа учесници во првата научна конференција каде што имаа свои излагања со научни информации за причините за загадувањето на воздухот во градовите низ републикава како и решенија за справување со овој многу сериозен проблем.
Конференцијата беше организирана преку проектот “City Tree”, спроведуван од Еко-свест а финансиски поддржан од Амбасадата на Сојузна Република Германија во Македонија.