Во септември лани беше 208 тенисерка во светот, а на најновата ВТА ранг листа што ќе биде објавена утре ќе биде петта. Со таква динамика во изминатите 12 месеци напредуваше Бјанка Ванеса Андрееску (19), сензационалната освојувачка на годинашното издание на Ју-Ес опен. Канадската тенисерка со романско потекло во финалето славеше со 6:3, 7:5 над Серена Вилијамс која по вторпат во низа не успеа до титула на „Флешинг Медоу“ (лани загуби од Наоми Осака).
„Ве разбирам дека сакавте Серена да победи, па жалам што не излезе така“, се обрати 19 годишната Андрееску до публиката по мечот која во слободното време обожува да медитира.
Андрееску си обезбеди место во тениските анали. И го заслужи. Одигра феноменално, не само финале, туку во текот на целиот турнир, а бројките што стојат зад нејзиното име по Њујорк се импресивни. Вклучувајќи го мечот со Серена Вилијамс, тинејџерката од околината на Онтарио има биланс од 8 победи и ниту еден пораз во дуелите со ривалки од топ 10. Во историјата влегува како прва тенисерка што во дебитантското учество во главната ждрепка на Ју-Ес опен успеала да ја освои титулата.
Зад Серена Вилијамс можеби беше целиот стадион „Артур Еш“ во Њујорк, но зад Андрееску беше целата нација во Канада.
„Навистина брзо напредуваше и таа сега ќе биде голема ѕвезда во земјата. Цела Канада ја гледаше во финалето. А, не така одамна, само страствените тениски фанови знаеја за неа. Сега ја запознаа сите“, напиша канадскиот спортски новинар, Елиот Фридман.
Победничката низа на Канаѓанката е 14 меча и во Њујорк се промовира во прва тинејџерка со грен слем титула по Марија Шарапова во 2006 година. Во текот на 2019 година има 34 триумфи и само четири порази, а викендот се израмни на листата по брзина на освојување на турнир од големата четворка. Пред Ју-Ес опен настапи во главна фаза на уште три грен слем турнири колку што ` беа потребни за собирање на искуство и на Моника Селеш пред походот до трофејот на Ролан Гарос во 1990 година. Со помалку од пет учества на гренслем турнир до финале во минатото стигнаа уште четири тенисерки – Пем Шривер, Крис Еверт, Венус Вилијамс и Наташа Зверева, но ниту една од нив не излегла како победничка.
„Бјанка за многумина беше фаворит за победа на Ју-ЕС опен. Начинот на кој победи во Индијан Велс, начинот на кој ја освои и титулата на „Роџерс Куп“ ја профилираа во тенисерка за големи мечеви“, истакна Пем Шривер во разговор за www.usopen.org.
Андрееску ќе биде заведена во историјата на „белиот спорт“ како прва Канаѓанка со гренслем титула. Родена е на 16 јуни во 2000 година, девет месеци по освоениот прв гренслем турнир на Серена Вилијамс во кариерата. По најголемиот успех во кариерата, таа беше затрупана со честитки од сите страни на социјалните мрежи, се јавија нејзините колеги и сонародници Васек Поспишил, Феликс Оче Алиасим и Јуџин Бушар, канадскиот премиер Џастин Трудо, НБА тимот на Торонто Репторс, хокеарската екипа на Торонто Мејпл Лифс, гренслем шампионките Били Џин Кинг, Мери Пирс и Симона Халеп, холивудската ѕвезда Криси Тиген и многу, многу други.