Еквадор синоќа соопшти дека ќе дозволи шведската влада да го испита основачот на „Викиликс“, Џулијан Асанж, кој од 2012 година се наоѓа во еквадорската амбасада во Лондон.
Министерството за надворешни работи на Еквадор објави дека во следните недели ќе бидат прецизирани процедурите за испитувањето на Асанж во амбасадата во Лондон и тогаш ќе се одржи состанокот.
Барањето на Шведска за испитувањето беше доставено уште во јуни.
Асанж во вторникот поднесе жалба на одлуката на окружниот суд во Стокхолм, кој го потврди налогот за негово апсење поради наводните кривични дела за силување и сексуално вознемирување, кои тој ги негира.
Обвинителите во Шведска сакаат да го испитаат Асанж за наводите на две поранешни волонтерки во „Викиликс“. Одбраната на Асанж бара налогот за апсење да се повлече, укажувајќи дека според шведскиот кривичен закон, обвинителството треба да ги истражи околностите на настанот во што е можен пократок рок, а финансиските и штетите на угледот на обвинетиот да бидат сведени на минимум.
Две Швеѓанки го обвинија Асанж дека сексуално ги вознемирувал, но официјално обвинение против него не е подигнато.
Во 2010 година, властите на Шведска побараа апсење и екстрадиција на Асанж. Британскиот суд во 2011 година донесе одлука Асанж да и биде испорачан на Шведска, по што тој побара засолниште во амбасадата на Еквадор.