Published: Thursday, April 29, 2021 14:42
Еквалис, невладината организација која се залага за еднакви права и еднаквост во пристапот до образованието организираше акција пред Министерството за труд и социјална политика по повод 1ви Мај. Еквалис го напиша следново на нивниот Фејсбук профил:
Секојдневието на работничките е неуморна борба за основни човекови права и родова еднаквост.
По повод 1ви Мај, Денот на работничките права, утрово, младите од Еквалис спроведоа јавна акција пред Министерство за труд и социјална политика, со цел да ги потсети релевантните субјекти дека состојбата со работничките права е критична и дека, дополнително на тоа, родовите аспекти се важен фактор којшто мора да се земе предвид при спроведувањето на законите и задоволувањето на правата на работничките и работниците во државата.
За време на акцијата, 4 волонтерки-активистки од Еквалис читаа 7 приказни од жени-работнички коишто зборуваат за условите во коишто работничките се принудени да работат секој ден.
Седумте приказни се преземени од делото на уметницата Кристина Божурска, „15 хорор приказни од работнички“. Приказните беа прочитани во слободен превод кон Македонски, Албански и Ромски јазик.
Во текот на мај, Еквалис ќе спроведе повеќе јавни акции коишто имаат за цел да ја кренат јавната свест и да ги потсетат релевантните институции за сериозноста на одредени општествени проблеми важни за младите во државата.