Емисијата 360 степени во синоќешното издание објави сторија, според која ЕВН Електрани, како фирма ќерка на ЕВН Македонија, имала купено најмалку 7 парцели во околината на Делчево со цел на нив да постави фотоволтаични централи за производство на електрична енергија.
Репортерот на 360 степени во сторијата објавува документи за две од тие парцели чии продавачи , успеале да им ги продадат на ЕВН Електрани по 800 денари за метар квадратен а ги купиле за само 15 – 20 денари за метар квадратен, три недели претходно.
Според сторијата на 360 степени, еден од продавачите Дарко Т. Земјиштето од 6.780 метри квадратни го наплатил близу 85 илјади евра што пресметано изнесува без малку 760 денари по метар квадратен, а другиот продавач Влатко И. Парцела од 38.243 метри квадратни ја продава за половина милион евра или пресметано по метар квадратен, 800 денари м2.
Купопродажните Договори ЕВН Електрани со овие лица/продавачи ги склучил на 21.09.2021 година или неполна недела пред стартот на изборната кампања за локалните избори и се обврзала дека средствата ќе ги исплати за 14 дена од денот на склучување на купопродажниот договор.
Она што е сомнително, наведува во репортажата 360 степени било тоа што двајцата продавачи Дарко Т. и Влатко И. сопственици на земјиштето, пред да и го продадат на ЕВН Електрани, стануваат три недели претходно, на први септември.
Влатко И. На парцелата станува сопственик без пари, односно таа му била подарена, покажуваат документите што ги објави 360 степени, а според кои на истиот ден , први септември, тој поднесол даночна пријава за данок на наследство и подарок кој е 5 %. Врз основа на пресметаниот данок се испоставува дека тој парцелата ја купил за 15 денари по метар квадратен. Додека другата парцела била купена за 20 денари м2, а на ЕВН Електрани им биле продадени три недели подоцна за без малку 760 односно 800 денари за метар квадратен.
Она, што дополнително фрла сомнеж на случајот кој го пријави вицепремиерот за борба со корупцијата, Љупчо Николовски, е што како управители на договорите во име на ЕВН Електрани, се потпишани извесен Мирослав Митровски од Скопје и Игор Гиевски кој е поранешен советник во Советот на Скопје од ВМРО-ДПМНЕ и поранешен претседател на Унијата на млади сили на ВМРО-ДПМНЕ.
И двајцата продавачи на земјиштето , наведува во репортажата 360 степени, биле на некој начин поврзани со опозициската партија. Дарко Т, кој бил советник во Општина Делчево од 2013-2017 година од ВМРО-ДПМНЕ а Влатко И. е или бил член на обезбедувањето на Христијан Мицкоски, лидерот на ВМРО-ДПМНЕ.
Прашањето што останува нејасно е на чие конто и каде завршиле парите од овие зделки. СДСМ тврдат дека тие завршиле во ВМРО-ДПМНЕ како црни пари со кои била финансирана кампњата, Од оваа партија негираат и сметаат дека влста го злоупотребуба системот со самото тоа што ова се актуелизира во четвртокот кога на дневен ред во Собранието беше точката за гласање (не) доверба на Владата.
Финансиската полиција, Општина Делчево, Обвинителството како и ЕВН Електрани, засега не излегуваат со дополнителни детали во јавноста во интерес на предистрагата за случајот во кој се сомничат 6 лица меѓу кои и таткото на пратеникот од ВМРО-ДПМНЕ, Јаулески , во чиј дом четвртокот рано наутро претрес изврши Финансовата полиција.