Денеска во Основниот суд Скопје 1 треба да се одржи рочиште за предметот „Еразмус“, во кој за поткуп се обвинети петмина професори, еден демонстратор од Економскиот факултет во Скопје.
Основното јавно обвинителство за гонење организиран криминал и корупција го поднесе обвинението во октомври минатата година.
Обвинителството ги товари обвинетите дека постојат докази што потврдуваат основано сомневање дека во повеќе наврати во подолг временски период, односно во текот на 2015 и 2016 година, како лица вработени на Економскиот факултет во Скопје, искористувајќи ја својата положба сториле кривични дела.
Осомничените биле следени две години со посебни истражни мерки, а дел од сведоците се и студенти.
Двајца од обвинетите сториле кривично дело – Примање поткуп, едно лице кривично дело – Примање поткуп и кривично дело – Примање награда за противзаконито влијание , две лица дека сториле кривично дело – Злоупотреба на службена положба и овластување и едно лице за кривично дело – Давање поткуп.
Тогаш Основниот суд Скопје 1- Скопје со Решение на обвинетите им изрече мерки на претпазливост со кои се стекнаа со обврска повремено да се јавуваат на определено службено лице и кај надлежен државен орган и им беа одземени патните исправи за преминување на државната граница.
По барање на Јавното обвинителство, Кривичниот суд во септември донесе одлука да им забрани на четворица осомничени професори од Економскиот факултет да продолжат да предаваат.
Акцијата на УКИМ со силно полициско обезбедување на 6. јуни годинава траеше со часови. Полицијата вршеше претрес во кабинетите, а професорот Бобек Шуклев беше задржан на паркинг просторот на кампусот, а претрес се правеше и во неговиот автомобил.