Владејачката партија на турскиот претседател Реџеп Таип Ердоган најави дека ќе поднесе жалба и ќе ја оспори победата на опозицијата во најголемиот град во земјата, Истанбул.
На локалните избори што се одржаа во неделата, кандидатите на опозицијата победија и во главниот град Анкара и во Измир. Владејачката партија сега обвинува за неправилности. Кандидатот на опозицијата има предност од 25.000 гласови во Истанбул. За градоначалник на Истанбул, кандидат на владејачката партија беше поранешниот турски премиер Бинали Јилдирим.
Владеачката партија ќе ја оспори и победата на опозицијата во Анкара.
Дел од медиумите контролирани од Владата известуваат дека кандидатите од владејачката партија не победиле поради, како што наведуваат, тоа што опозицијата ги фалсификувала изборите со кражба на гласачки ливчиња.
Повеќе од 57 милиони луѓе се регистрирани гласачи во Турција. На изборите за градоначалник и советници гласале околу 85 проценти.
Ердоган водеше два месеци кампања во која зборуваше дека изборите се за „опстанокот” на Турција.
Критичарите сметаат дека со повеќето медиуми контролирани од приврзаниците на Ердоган, опозициските партии беа во неповолна положба, затоа што митинзите на Ердоган доминираа на телевизите.
На национално ниво, владејачкиот сојуз освои 51,6 отсто од гласовите.
Но, Истанбул е во рацете на партии поврзани со Ердоган од 1994 година, кога тој беше избран за градоначалник на градот. Би би си анализира дека „губењето на поголемите градови е значаен удар за Ердоган, кршејќи го неговиот имиџ на непобедливост“.
Изборите се одржаа во време на економска криза. Вредноста на турската лира неодамна падна, а економијата е во рецесија од крајот на 2018 година. Инфлацијата минатата година достигна 20 отсто, а невработеноста се зголеми.




