Реџеп Тајип Ердоган во своето обраќање пред локалните лидери на неговата владејачка Партија на правдата и развојот (АКП) се огради од министрите кои денеска поднесоа оставки, потенцирајќи дека неговата партија „останува решителна во борбата против корупцијата“.
Како и во јуни годинава, Ердоган оцени дека неговата Влада е цел на „меѓународен заговор, во кој учествуваат медиумите и банди од Турција“.
– Има медиумски институции, организации и банди во Турција, кои мислат за странски интереси, а не за интересите на сопствената држава и работат како шпиони, напомена турскиот Премиер.
Воедно тој минатата недела се закани со протерување на странски дипломати, откако четири провладини весници го обвинија амбасадорот на САД, Франсис Ричардоне дека спроведувал заговор против Владата.
„Сабах“ денеска објави дека Ричардоне убедил бизнис група да се приклучи кон антивладиното лоби.
– Тврдењата за службеници од американската Амбасада, објавени во некои медиуми, не ја отсликуваат вистината. Не треба никој да им наштетува на турско-американските односи со такви клевети, соопшти Амбасадата на САД во Анкара во врска со обвинувањата на „Сабах“.