Американскиот заменик-помошник државен секретар Габриел Ескобар денеска изјави дека актуелната црногорска влада ќе ужива американска поддршка се додека е демократска и фокусирана на европската иднина на земјата. Тој посочи и дека на последниот самит на НАТО, иако неформално, било изразено стравување дека е опасно да се споделат сите информации со новата влада во Подгорица, пишува црногорскиот портал cdm.me.
Ескобар додаде дека единственото решение за тензиите на Балканот е членството на земјите од регионот во ЕУ.
„Отсекогаш верувавме дека клучот за стабилноста на овој регион е неговото членство во ЕУ“, рече Ескобар.
Тој смета дека политиката на САД кон регионот се нема променето и покрај смената на администрацијата и повтори дека нивната цел е да се воспостави владеење на правото, борба против корупцијата и развој на демократските институции. Ескобар сепак најави засилено американско присуство и посветеност кон регионот, вклучувајќи го и јасниот фокус што го поставил претседателот Џо Бајден за регионот.
На прашањето како САД можат да им помогнат на балканските земји за да постигнат стабилност, тој одговори дека САД имаат голем буџет што може да им помогне за постигнување на посакуваните резултати.
„На повисоко ниво, ние ја користиме секоја можност да ги охрабриме нашите европски партнери да го забрзаат процесот на интеграција на Балканот, кој е регион со исклучителен потенцијал“, истакна Ескобар.
Коментирајќи го мешањето на Русија во внатрешните работи на Црна Гора, Ескобар рече дека САД имаат и дипломатски и политички одговор, за да се изолираат силите што не сакаат суверена и демократска Црна Гора.
Тој направи разлика меѓу проруските и просрпските сили.
„Просперитетните сили во Црна Гора треба да разберат дека Црна Гора треба да биде суверена, демократска, западно ориентирана членка на НАТО“, рече Ескобар, додавајќи дека за оние сили што го поткопуваат напредокот на земјата, што е успешна приказна речиси 25 години, САД имаат одговор во форма на санкции и политички притисоци.
Тој потврди дека на последниот самит на НАТО, иако неформално, било кажано дека е опасно да се споделат сите информации со новата влада во Подгорица, додавајќи дека загриженоста е реална и дека луѓето во Црна Гора треба да бидат свесни за тоа.
„НАТО има многу начини да ги чува информациите, но секоја влада треба да биде свесна дека тоа е нешто што ги слабее и организацијата и земјата“, истакна Ескобар.
Ескобар се согласува дека сегашната ситуација на Балканот има многу сличности со 1990 -тите, кога ескалираа етничките тензии и додава дека постојат повеќе страни кои сакаа да ги искористат тие тензии.
„Од Дејтон навака се случија многу позитивни работи, и кога ќе ги анализирате, ќе видите дека сите тие беа плод на евроатлантската интеграција. Затоа на нашите европски партнери им ја споменуваме потребата за забрзување на интеграцијата и затоа Балканот е секогаш високо на нашата агенда кога зборуваме за нив“, рече Ескобар, кој е убеден дека Европа ќе го разбере огромниот потенцијал на Балканот и дека за три години оваа област ќе биде просперитетен регион.