Американскиот заменик-помошник државен секретар Габриел Ескобар, кој е и специјален пратеник на претседателот Бајден за Западен Балкан, денес во својата порака до учесниците на самитот на Отворен Балкан во Охрид што ја упати преку видео врска, нагласи дека Соединетите Американски Држави го гледаат Западен Балкан преку призмата на 21 век, во обезбедување соработка на сите полиња, користејќи ја својата добра географска положба.
Тој подвлече дека „земјите на Западен Балкан имаат огромен потенцијал и претприемачки дух за економска и регионална соработка во областа на обновливата енергија, за надминување на проблемите кои ги носат климатските промени“.
„Иницијативата доаѓа во многу битно време и ги охрабрувам лидерите да го усогласат Отворен Балкан со другите иницијативи на Западен Балкан. Земјите од регионот може да сметаат на помошта од САД во однос на економијата, борбата против корупцијата и криминалот и европската интеграција“, порача американскиот претставник. (Р.Н.)