Европскиот суд на правдата (ЕСП) денеска донесе одлука дека земјите-членки треба да ги признаат хомосексуалните бракови склучени во другите земји-членки на ЕУ каде тоа е дозволено и смета дека овие двојки треба да ги уживаат истите права во земјата каде престојуваат што ги уживаат другите семејства.
-Иако земјите-членки имаат слобода да дозволат брак меѓу лица од ист пол или не, тие не можат да ја попречуваат слободата на живеење на државјанин на ЕУ, одбивајќи да му дозволат изведено право на престој на нивната територија на неговиот брачен другар од ист пол, државјанин на земја што не е земја членка на ЕУ, соопшти судот.
Судот донесе одлука во корист на правото на Романецот Адријан Коман да живее со својот американски партнер Клеј Хамилтон со него во Романија.
Романија, која не признава истополови браков, тврди дека Американецот нема право на престој во ЕУ врз основа на склучен истополов брак.
Но, Европскиот суд на правдата смета дека терминот “брачен другар” е родово неутрален.
Адријан Коман и неговиот американски партнер Клеј Хамилтон склучиле брак во Брисел во 2010 година.
-Благодарни сме на Судот на ЕУ и на многуте луѓе и институции кои не поддржаа, и преку нас, поддржаа и други истополови двојки во слична ситуација, рече Коман, додавајќи дека денес победило човечкото достоинство.
Уште во јануари, високиот советник на ЕСП, Мелчиор Вателе, рече дека терминот “брачен другар” може да вклучи – според правилата за слобода на живеење за граѓаните на ЕУ и нивните членови на семејството – сопружници од ист пол.