Министрите за надворешни работи на ЕУ денес заклучија дека во Босна и Херцеговина (БиХ) не смее повеќе да има насилство. Шефицата на надворешната политика на ЕУ Кетрин Ештон вечерва изјави дека ЕУ го осудува насилството и дека проблемите на БиХ треба да се решаваат.
“Лидерите во БиХ треба да одговорат на економските проблеми. невработеноста и проблемите на младите. И на политичките теми кои одамна се на нашата агенда за БиХ. Ние се надеваме дека тие ќе ги решат овие проблеми и дека ќе се оди напред. Ние сме тука да им помогнеме”, изјави Ештон во Брисел.
И амбасадорите на земјите на ЕУ во БиХ издадоа соопштение во кое велат дека протестите и учеството на граѓаните е од суштинско значење за здрава демократија и витален дел на интеграцијата во ЕУ. Тие бараат протестите да се одржуваат мирно и дека насилството е неприфатливо.
«Од сите власти во БиХ очекуваме да делуваат со должното почитување кон јавноста и да ги почитуваат личната слобода на изразување, слободата на протести», вели соопштението.
Дијалогот помеѓу власта и граѓаните треба да биде отворен и лидерите на БиХ треба пред се да ги сослушаат граѓаните. «Оттука очекуваме дека сите лидери и политичари ќе се вклучат во дијалогот со граѓаните.
Овој дијалог мора да се бави со прашања како зајакнување на правната држава, оживување на економијата и подобрување на квалитетот на животот. Притоа тие треба директно и веродостојно да понудат преку конкретни активности одговори на прашањата», велат земјите на ЕУ.
Конечно, тие ги отрфлуваат обидите протестите да се искористат за зајакнување на националните тензии и очекуваат нормализирање на јавниот живот.