Шефовите на дипломатиите на државите од ЕУ денеска треба да одлучат за заштитата на надворешните, а делумно и на шенгенските граници на Унијата, со поставување неколку илјади припадници на „европската гранична стража“, која би можела да делува независно од властите на земјите – членки.
Ваквиот предлог до министрите го поднесе европскиот комесар за миграции Димитрис Аврамопулос, според кого таквата „револуција на границите на ЕУ“ е за да се заштити Европа и видливо да се намали приливот на бегалци, со поставување рампа за илегалната емиграција.
Оваа мерка се поклопува со барањето на повеќето влади од ЕУ за намалување на приливот на имигрантите и посебно со клучната порака на германската канцеларка Ангела Меркел дека мора „забележливо да се намали приливот на бегалци“ бидејќи, како што рече станува „огромен предизвик“.
Извори од Европската комисија велат дека „залогот е да се спаси Шенгенскиот договор и просторот за слободна трговија внатре во Унијата, кој е загрозен поради слабата одбрана на границите на ЕУ“, имајќи го предвид фактот дека преку порозните и надворешни и шенгенски граници на Унијата успеале да се инфилтрираат терористи.