Врз домот на директорот на косовската радио телевизија вчера беше фрлена бомба која за среќа не предизвика жртви.
Ова е четврти напад од ваков вид во Приштина. На 22 август беше фрлена бомба и во просториите на косовската Радио-телевизија РТК. На 4 август беше фрлена експлозивна направа врз косовскиот парламент а на 9 август слична направа беше фрлена на покривот на куќата на Мурат Меха, директор на комисијата за демаркација помеѓу Косово и Црна Гора.
Полицијата, која отвори истрага, соопшти дека бомбата била фрлена во дворот на куќата на Ментор Шала, генералниот директор на РТК.
Шала изјави дека експлозијата силно одекнала додека целото негово семејство било внатре во куќата и никој не бил повреден.
На 22 август во просториите на РТК бомбата направила материјална штета.
Се уште не е познато кој стои зад овие експлозии. Според соопштението на владата овој напад “криминален акт кој е насочен кон слободата на медиумите во Косово”.
Канцеларијата на ЕУ во Приштина е загрижена по овие напади и изјави дека “циклусот напади на Косово станува се посериозен”.
Според соопштението на РТК, експлозиите насочени кон нив се резултат на говорот на омраза против РТК на повеќе политичари.
“Ние веруваме дека говорот на омраза што го користат различни политички сили, особено Самоопределување, се вистинската опасност и закана за нормално функционирање на јавниот сервис”, соопшти РТК.
Опозициското движење Самоопределување го отфрли ова обвинување. Познато е дека Самоопределување често ја критикува работата на РТК и тврди дека јавниот сервис ја поддржува владеачката Демократска партија ПДК и Демократскиот сојуз на Косово ЛДК. На прес конференција на 26 август Самоопределување ја нарече РТК “портпарол” на владата и ја обвини дека одбила учество на лидерот на Самоопределување во една дебата на РТК во која темата била договорот за демаркација помеѓу Косово и Црна Гора.
Организациите кои се борат за слобода на медиумите предупредуваат дека новинарите и медиумите на Косово се честа цел на напади и закани.
Во септември 2014 година еден новинар познат по своите текстови поврзани со исламот во политиката доби закани во кои се велеше дека ќе му биде отсечена главата поради текстовите во кои тој ги критикуваше муслиманските интегристи во земјата.