Европската унија е подготвена да ја извади својата “атомска бомба” против Унгарија.
Европскиот парламент (ЕП) денес побара од земјите членки на ЕУ да ја почнат процедурата за санкционирање на Унгарија поради постојаните нарушувања на европските вредности. Мнозинството европски пратеници денес кренаа рака “за” активирање на членот 7 од Лисабонската повелба. А тоа значи дека тие бараат од земјите членки да ја активираат најзначајната европска санкција со која на Унгарија ќе и се одземе правото на глас во ЕУ.
Овој член одамна постои во европските повелби но досега никогаш не бил активиран.
Има повеќе причини за оваа лутина на ЕУ против Унгарија. Како нехуманиот третман на бегалците, заканите за укинување на Универзитетот на југо-источна Европа, анти-европската реторика на премиерот Виктор Орбан, третманот на медиумите, политичката зависност на судството итн.
Текстот што денес го одобри ЕП во кој се бара активирање на членот 7 беше поддржан од групата на либералите и социјалистите но поддршка дадоа и членови на демохристијанската Европската народна партија (ЕНП) и покрај тоа што Фидеш, партијата на Орбан е дел од оваа политичка група.
Претседателот на ЕНП Манфред Вебер излезе со друг текст во кој не се споменува членот 7 но тој негов став наиде на противење во редовите на неговата политичка демохристијанска група. Така, белгиските членови на оваа група гласаа за текстот на либералите и социјалистите а не за текстот на нивната партија.
Ќе биде без сомнение тешко да се активира овој член кој бара едногласност во гласањето на земјите членки. Но самиот чин во кој официјално се бара активирање на “атомската бомба” е без преседан и изразува надеж дека Будимпешта ќе се врати на патот на европските вредности пред да се продолжи со таа процедура.
Вкупно 393 пратеници гласаа за активирање на членот 7, 221 беа против и 64 воздржани.