Европската унија разгледува воведување нови санкции против Владата на претседателот на Венецуела Николас Мадуро, но не и ембарго на нафтата, соопшти министерот за надворешни работи на Малта, Кармело Абела.
– Целта е санкциите да се воведат на поединци, наместо дополнително да ја ослабнат веќе слабата економија, рече Абела.
ЕУ од ноември 2017 година воведе ембарго на извоз на оружје и техничка опрема на Венецуела поради внатрешната репресија, како и забрана за патување и замрзнување на сметки на 18 функционери, кои се обвинети за кршење човекови права и поткопување на демократијата.
Експертите сметаат дека санкциите на ЕУ до сега имале мало или никакво влијание врз политиката на Мадуро.
Генералниот секретар на ОН Антонио Гутереш изјави дека светската организација нема да учествува во ниту една инцијатива на групите што се формираат во врска со решавањето на кризата во Венецуела, за да ја зачува неутралноста и кредибилитетот како организација која може да им помогне на сите сите страни во изнаоѓање решение.
Гутереш со ова објасни зошто претставници на ОН нема да учествуваат на состанокот на Групата од Лима во Отава.
На тој состанок ќе се разговара за тоа како да им се помогне на луѓето во Венецуела, вклучувајќи и испраќање директна хуманитарна помош, соопшти кабинетот на канадскиот премиер Џастин Трудо.
Групата од Лима во август 2017 година ја формираа 12 земји од Северна и Јужна Америка: Аргентина, Бразил, Канада, Чиле, Колумбија, Костарика, Гватемала, Хондурас, Мексико, Панама, Парагвај и Перу.




