Министрите за надворешни работи на ЕУ, заедно со нивните колеги за одбрана, ќе разговараат околу можни нови санкции против Москва.
До сега ЕУ усвои четири пакети санкции против Русија, но енергетскиот сектор, нафтата, јагленот и гасот, до сега беше поштеден.
Низа земји членки бараат сериозно да се разгледаат санкции во енергетскиот сектор.
Литванскиот министер за надворешни работи, Габриелиус Ландсбергис, порача дека не смее ЕУ да си дозволи да не покаже единство пред Русија во овој момент.
„Неизбежно е да почнеме да разговараме за енергетскиот сектор, дефинитивно нафтата бидејќи е најголем приход во рускиот буџет, а е лесно заменлив“, изјави шефот на литванската дипломатија.
На иста линија е и ирскиот министер за надворешни работи, чија земја не е многу зависна од руската енергија, кој изјави дека е отворен за оваа дискусија. Меѓутоа шефот на ЕУ дипломатијата, Жосеп Борел, и претседавач на денешниот министерски совет, не сакаше да коментира на оваа тема. Тој само кусо изјави дека ќе се разговара прашањето на денешниот состанок.
Францускиот министер, Жан Ив Ле Дриан, пред почетокот на состанокот се осврна исклучиво на ризикот за прехранбената индустрија на глобално ниво поради руско-украинската војна.
„Не се санкциите одговорни за овие дисфункционирања, туку војната, нема санкции во прехранбениот сектор, туку војната е причината, мораме да го земеме предвид овој нов податок“, рече Ле Дриан и предупреди дека е можна “страшна криза“ на глобално ниво.
И генералниот секретар на Обединетите Нации, Антонио Гутереш, на Твитер напиша дека на светот му се заканува криза на прехранбени производи поради војната во Украина.
Украина и Русија произведуваат повеќе од половина од основните житарици во светот, војната веќе има последици врз цените и набавките, кои највеќе ги погодуваат најсиромашните земји, пред сѐ во Африка и на Блискиот Исток.
(Извор: МИА)