Лидерите на 27 земји членки на ЕУ денеска ќе се соберат на неформален, но многу значаен самит во Братислава на кој најмногу ќе се разговара за иднината на ЕУ без Велика Британија.
Првиот голем состанок на челниците на Унијата без Британија ќе има две цели: план за идниот однос со Британците и план за реформирање на Унијата.
Во обата случаја, како што пишува весникот Блумберг, целта е на крајот да се осигура дека заминувањето на Британија нема да го ослабе, туку ќе го зајакне европскиот проект.
Формалните преговори за Брегзит ќе започнат со почетокот на следната година, а најзначајното прашање уште сега е познато – спорот меѓу британската желба за повластен пристап на единствениот европски пазар и инсистирањето на ЕУ дека таков пристап подразбира слободно движење на работниците во Британија.
Како што претходно најави претседателот на Европскиот совет Доналд Туск, тема на разговор во Братислава нема да биде само Брегзит, туку и преземањето на политичката контрола над заедничката иднина.
Тој ги повика лидерите на ЕУ трезвено и сосема отворено да ги разгледаат проблемите на блокот, по шокантната одлука на Британците да ја напуштат Унијата.
Воедно го повика да постават реална дијагноза за тоа што го предизвика Брегзит и да ги уверат граѓаните дека од Брегзит извлекле поука и дека се способни да и ја вратат стабилноста и чувството на безбедност.
Така, во центарот на разговорите на европските лидери меѓу другото ќе се најде и решавањето на мигрантската криза, јакнењето на безбедноста и одбранбената соработка, борбата против тероризмот и друго.
Претседателот на Европската комисија Жан Клод Јункер завчера во годипниот говор за состојбата во унијата пред Европскиот парламент во Стразбур истакна дека ЕУ ги почитува и истовремено жали за одлуката на Британија но дека Унијата како таква не е под знак прашање.
ЕУ се наоѓа во егзистенцијална криза но нема да се распадне поради Брегзит, нагласи тој и повика на поголемо заедништво и солидарност, додавајќи дека следните 12 месеци ќе бидат одлучувачки.
Словачкиот премиер и домаќин на самитот Роберт Фицо воочи самитот рече дека состанокот би требало да одговори на прашањето, каде е денес ЕУ, но и да изнесе теми кои покажуваат дека е проект за кој вреди да се бориш.