Домаќинот Франција е последнaта селекција која си обезбеди место во полуфиналето на Европското првенство во фудбал, откако во четврт-финалето на „Стад де Франс“ во Париз вечерва славеше победа со 5:2 над Исланд.
Со рекордното прво полувреме, Франција стана првата репрезентација во историјата на европските првенства што постигнала четири гола во првите 45 минути. За тоа се заслужни Жиру, Погба, Паје и Гризман, по што следуваше уште еден погодок на Жиру во вториот дел од мечот.
Исланд успеа да го ублажи резултатот со головите на Сигторсон и Бјарнасон.
Франција во полуфиналето што ќе се игра в четврток за противник ќе го има светскиот првак Германија, додека ден претходно, првиот полуфинален меч ќе биде помеѓу полуфиналистите Велс и Португалија.