Повеќе од половината граѓани на земјите на ЕУ, или 57 проценти од анкетираните, се чувствуваат како неделив дел на Унијата, а во еврозоната тој процент е малку поголем- 64 отсто, јавува дописникот на МИА од Прага.
Според резултатите од анкетата на Евробарометар, со ЕУ најмногу се идентификуваат граѓаните на Луксембург и тоа 88 проценти, на Малта, 82 проценти, Словаците, 76 проценти и Германците и Финците по 73 проценти.
Како дел на европската заедница на 28-те држави најмалку се чувствуваат Чесите, (54 проценти), Романците, 53, Италијанците 52, Бугарите и Британците по 48 проценти, како и 45 проценти и 44 посто од жителите на Кипар и Грција.
И покрај економската криза во најголем дел од земјите на Унијата, кај населението на половината членки (19), се уште преовладува оптимизмот за иднината на Унијата. Во таа насока, најголеми оптимисти се Данците (72 проценти), Естонците и Латвијците по 64 проценти и граѓаните на Малта и Полска по 63 проценти.
Спротивно мислење имаат Чесите, само 42 проценти се оптимисти, Британците и Шпанците (по 40 проценти), Грците (30 проценти) и по 28 проценти жителите на Кипар и Португалија.
Огромно мнозинство од Европејците, 67 проценти, се убедени дека нивниот глас не одлучува во Унијата. Исклучок е Данска, каде 56 проценти од луѓето мислат дека нивниот глас е важен во европската заедница.
Анкетираните Европејци, за најголем успех на ЕУ го сметаат слободното движење на луѓето, стоките и службите. Потоа следи мирот во земјите-членки.
Европејците, главно се длабоко незадоволни со економиите на своите земји, односно само 24 проценти од нивниот вкупен број се задоволни од државната финансиска стабилност. Дури 55 проценти од луѓето сметаат дека најлошото допрва ги чека, додека 36 проценти сметаат дека најлошото поминало.
Чесите, по ова прашање се над ЕУ просекот, кога 39 проценти од населението сметаат дека најлошото е зад нив. Истражувањето било извршено во мај, меѓу 32.000 испитаници.