Стапката на инфекција со коронавирус е убедливо највисока во Европа, која пријави околу 192 нови случаи на 100.000 луѓе, а потоа следуваат Северна и Јужна Америка, кои имаат приближно 72 нови случаи на 100.000 лица
Бројот на нови случаи од коронавирус во Европа се зголемува веќе петта недела по ред, што ја прави единствениот регион во светот кадешто инфекцијата со ковид-19 продолжува да расте, објави денеска Светската здравствена организација (СЗО).
Во неделниот извештај за пандемијата се наведува дека бројот на нови случаи скокнал 6,0 отсто во Европа, пренесуваат агенциите.
Неделниот број на нови заразени во другите региони опадна или остана приближно ист, се наведува во извештајот.
Најголем пад е забележан на Блискиот Исток, каде што бројот на новозаболени е намален 12 отсто, и во Југоисточна Азија и Африка, каде што бројот е намален девет отсто.
Вкупно три милиони нови неделни случаи се пријавени во светот, се вели во извештајот.
Бројот на смртни случаи од Ковид-19 во светот е зголемен 8,0 отсто, најмногу поради ситуацијата во Југоисточна Азија, каде што стапката на смртност се зголемила 50 отсто.
Стапката на инфекција со коронавирус е убедливо највисока во Европа, која пријави околу 192 нови случаи на 100.000 лица, а потоа следуваат Северна и Јужна Америка, кои имаат приближно 72 нови случаи на 100.000 лица.
СЗО, исто така, ги осуди богатите земји за воведувањето дополнителни дози во време кога повеќето сиромашни земји допрва треба да администрираат вакцини за своите најранливи популации.