Тројцата европратеници Иво Вајгел, Едвард Кукан и Кнут Флекенштајн на прес конференцијата попладнево во Скопје во заедничка изјава ги сумираа резултатите од денешните средби со претставниците на политички партии потписнички на Договорот од Пржино, со специјалната обвинителка Катица Јанева и со претставници на граѓанското општество.
– Сите партии се оптимисти во однос на очекувањата од изборите. Од она што денеска го видовме и слушнавме имаме добра причина да веруваме дека изборите ќе бидат фер и транспарентни и дека ќе претствуваат почеток на ново време за Македонија. И убедени сме дека по изборите, новата влада ќе се врати на спроведување на приоритетите и евроинтегрциите, рече Иво Вајгл, известувачот на ЕП за Македонија.
Во однос на работата на Специјалната јавна обвинителка, Вајгл рече дека ја повториле нивната поддршка за работата на СЈО.
– И нагласивме дека е важно на јавните обвинителства да не се гледа како да заземаат страна или дека се заинтересирана страна во процесот на избори, и во периодот пред самите избори, нагласи Вајгл.
Уште на почетокот на прес конференцијата тие соопштија дека нема да одговаат на новинарски прашања.
Европратениците претпладнево средбите ги започнаа со специјалната јавна обвинителка Катица Јанева, по што се сретнаа со лидерите на СДСМ, ДПА, ДУИ, Зоран Заев, Мендух Тачи и Али Ахмети, додека од ВМРО ДПМНЕ разговараа со Никола Попоски.