Европската вселенска агенција објави дека ја суспендирала руско-европската мисија на Марс, поради руската инвазија на Украина.
„Длабоко жалиме за човечките жртви и трагичните последици од агресијата кон Украина. И покрај тоа што го препознава влијанието врз научното истражување на вселената, ЕСА е целосно усогласена со санкциите наметнати на Русија од нејзините земји-членки“, се вели во соопштението на ЕСА.
За време на состанокот во Париз, владејачкиот совет на ЕСА „ја призна сегашната неможност за спроведување на тековната соработка со руската вселенска агенција Роскосмос на мисијата на роверот ЕгзоМарс за лансирање во 2022 година, и му наложи на генералниот директор на ЕСА да преземе соодветни чекори за суспендирање“, се вели во соопштението.
И покрај суспендирањето на мисијата на Марс, ЕСА соопшти дека програмата на Меѓународната вселенска станица „продолжува да работи номинално. Главната цел е да се продолжи безбедното работење на мисијата, вклучително и одржување на безбедноста на екипажот“.
„Во текот на изминатите два дена, нашите земји-членки разговараа за влијанието на војната во Украина врз вселенските програми на ЕСА. Заедно, донесовме тешка – но неопходна – одлука да го прекинеме лансирањето на ЕгзоМарс предвидено за септември со Роскосмос и да ги проучиме опциите за понатаму“, се наведува во соопштението.
Инаку, во моментов има четворица астронаути на НАСА, двајца руски космонаути и еден европски астронаут кои живеат и работат во орбитата.
Со оглед на ситуацијата во Украина, генералниот директор на агенцијата ќе свика вонредна седница на владејачкиот совет на ЕСА во наредните недели „за да поднесе до земјите членки конкретни предлози за понатаму“, се вели во соопштението.