Светската економија оваа година нагло ќе забави поради војната во Украина, која ја намали куповната моќ на граѓаните, а Европа ќе претрпи најтешки последици, предупреди Организацијата за економска соработка и развој (ОЕЦД).
Светската економија во 2022 година ќе порасне за три отсто, проценува ОЕЦД, намалувајќи ја својата декемвриска прогноза за 1,5 процентни поени. Растот, пак, во 2023 година би требал малку да забави, на 2,75 отсто, пресмета организацијата во последниот извештај.
„Најтешко ќе бидат погодени европските економии, бидејќи тие се најмногу изложени на војната преку увоз на енергија и прием на бегалци. Економијата на еврозоната оваа година ќе порасне за 2,6 отсто, половина помалку од 2021 година. Се очекува инфлацијата да достигне седум проценти во 2022 година и да забави до 4,6 проценти во 2023 година“, проценува ОЕЦД.
Германската економија, според ОЕЦД, ќе порасне за 1,9 отсто во оваа година и за 1,7 отсто во 2023 година, бидејќи „закрепнувањето од корона-кризата ќе биде попречено од војната во Украина и ембаргото на руската нафта“.
„Се предвидува дека Франција оваа година ќе има раст од 2,4 отсто, што би требало да забави на 1,4 отсто во 2023 година. Поради војната во Украина, италијанскиот БДП ќе порасне за само 2,5 отсто оваа година, по скокот од 6,6 отсто во 2021 година и ќе забави на 1,2 отсто во наредната година. Оваа година се очекува раст на економијата на Шпанија за 2,2 отсто поради зголемената неизвесност, високата инфлација и послабата надворешна побарувачка, а британскиот БДП ќе порасне за 3,6 отсто во 2022 година и ќе стагнира во 2023 година“, покажуваат пресметките на ОЕЦД.
„Економијата на САД ќе порасне за 2,5 отсто оваа година, по растот од 5,7 отсто во 2021 година, бидејќи проблемите со снабдувањето, повисоките цени на нафтата и побрзото темпо на нормализирање на монетарната политика ќе ги забават активностите повеќе од очекуваното“, соопшти ОЕЦД.
Јапонија го запре бранот на инфекција со варијантата омикрон на коронавирусот, па очекувањата се дека економијата ќе порасне за 1,7 проценти оваа година и за 1,8 проценти во 2023 година.
„Поради пандемските ограничувања, кинеската економија нагло забави и ќе порасне за само 4,4 проценти во оваа година, а потоа ќе забрза во 2023 година, со проектирана стапка на раст од 4,9 проценти“, проценува ОЕЦД.
Војната во Украина негативно влијае и на индиската економија, со оглед на нејзината зависност од увоз на енергија. Така, растот на индискиот БДП во фискалната 2022 година би требало да забави на 6,9 отсто и на 6,2 отсто во 2023 година.
Во исто време, руската инвазија врз Украина ги намали надежите дека високата инфлација поттикната од прекините на снабдувањето во пандемијата на Ковид-19 ширум светот наскоро би можела да ослабне.
„Со оглед на тоа што Русија и Украина се водечки снабдувачи со многу суровини, нивните цени нагло се зголемија поради војната. Доколку нешто не се преземе, постои голема опасност и од криза во снабдувањето со храна“, предупреди ОЕЦД.