Ризикот од рецесија во еврозоната достигна највисоко ниво од јули во 2020 година, затоа што расте и загриженоста дека зимската енергетска криза ќе предизвика пад на економските активности.
Економистите кои ги анкетираше „Блумберг“, сега проценуваат дека веројатноста за контракција во два последователни квартала е 80 отсто во наредните 12 месеци, во однос на 60 проценти во претходното истражување. Најголемата економија во блокот и онаа меѓу најизложените од намалувањето на испораките на гас, германската, веројатно ќе падне уште во овој квартал.
Домаќинствата и компаниите во Европа се подготвуваат за можноста на рационализација на енергијата откако Русија ги исклучи испораките гас и веќе се борат со рекордно високата стапка на инфлација и други тесни грла во снабдувањето. Според анкети, активноста се намалува од јули, со неколку добри знаци во блиска иднина.
Во последните три месеци од оваа година се очекува инфлацијата да достигне врв од 9,6 отсто, што е речиси петпати повеќе од проекциите на Европската централна банка (ЕЦБ). Испитаниците не гледаат дека се приближува до целта од два отсто до 2024 година.
Расте загриженоста поради инфлацијата
Иако претставниците на ЕЦБ предвидуваа дека економијата на еврозоната само ќе стагнира, а не и да се намали, при ажурирање на ставовите овој месец ја зголемија загриженоста околу порастот и изгледите за инфлацијата во регионот. Претседателката Кристин Лагард и нејзините колеги ги оправдаа големите покачувања на каматните стапки со решеност да го скротат растот на цените, иако економистите сметаат дека им истекува времето за преземање такви дејствија.
Испитаниците сметаат дека ЕЦБ ќе го паузира циклусот на зголемување на каматните стапки, но до февруари ќе ги подигне каматните стапки на највисоко ниво од два отсто за депозитната стапка. Повеќе од половина очекуваат зголемување од 75 базични поени на следниот состанок на ЕЦБ во октомври.
Главниот економист Филип Лејн минатата недела изјави дека невообичаеното големо зголемување на каматните стапки на ЕЦБ месецов било соодветно, истовремено сигнализирајќи дека идните чекори веројатно ќе бидат помали. По најновата одлука, други претставници на ЕЦБ за „Блумберг“ кажаа дека не исклучуваат понатамошно зголемување од 75 базични поени.