„Фајзер“ во дебела позитива во вториот квартал – приходи од 27,7 милијарди долари, добивка од 9,9 милијарди долари

Добивката на американската фармацевтска и биотехнолошка корпорација „Фајзер“ во вториот квартал ги надмина очекувањата на аналитичарите, објави денеска компанијата.

Добивката се зголеми на 9,91 милијарди долари или 1,73 долари по акција, од 5,56 милијарди долари или 0,98 долари по акција во вториот квартал минатата година.

„Фајзер“, исто така, соопшти и за приспособена заработувачка од 11,66 милијарди долари, или 2,04 долари по акција, за истиот период. Аналитичарите во просек очекуваа компанијата да заработи 1,80 долари по акција, според податоците собрани од „Томсон Ројтерс“.

Приходите на компанијата во вториот квартал скокнаа за 46,8 отсто на 27,74 милијарди долари од 18,90 милијарди долари во истиот период минатата година.