Итни мерки за справување со „африканска свинска чума“ на Балканот, Поддршка за подобрување на националниот надзор на штетници кај растенија и системот за фито-санитарна сертификација, Подобрена методологија за собирање податоци за одржливо управување со рибни ресурси во Западен Балкан и Стратегии за намалување на загуби и отпад од храна, се четирите регионални проекти што денеска ќе ги промовира Организацијата за храна и земјоделство на Обединетите нации (ФАО) на заедничка прес-конференција со Министерството за земјоделство, шумарство и водостопанство.
Како што информираат од Канцеларијата на ФАО, станува збор за проекти вредни вкупно 1,5 милион американски долари.
Еден од проектите ќе треба да ги идентификува загубите на храна кои во Македонија годинава достигнале 80 отсто, додека 460 илјади граѓани се соочуваат со сиромаштија и проблем да обезбедат јадење.
Од вкупното производство на храна, Македонија може да извезува 87 отсто, а со 13 отсто може да ги задоволи домашните потреби, но нема доволно преработувачки капацитети, слаб е пристапот до странски пазари, а се поизразени се и климатските промени, беше истакнато на денешната прес-конференција.
Зависно од типот на проектот, времетраењето на активностите е различно, а вклучени ќе бидат Македонија, Албанија, Босна и Херцеговина, Косово, Црна Гора, Србија, Ерменија, Белорусија, Грузија, Молдавија, Украина.
На прес-конференцијата ќе се обратат министерот Љупчо Николовски и Гордана Кожухарова, ФАО Програмски специјалист и одговорно лице за програмата на ФАО во Република Македонија, Регионална канцеларија на ФАО за Европа и Централна Азија.