Во Младинскиот културен центар (кино „Фросина“), денеска во 19 часот, ќе се одржи проекцијата на 4 македонски документарни филмови: „Живот во движење“ на Игор Христов, „Бродот што никогаш не поминал“ на Александар Спасоски, „На точак“ на Горјан Атанасов и документарниот филм за студентскиот дом „Гоце Делчев“ во Скопје со наслов „Зелени ѕидови, црна храна“ на Сандра Ѓоргиева.
Документарниот филм „Зелени ѕидови, црна храна“, во режија и монтажа на Сандра Ѓоргиева, е приказна за секојдневието на студентите во Студентскиот дом „Гоце Делчев“ во Скопје, Р. Македонија, студентски дом кој во минатото важел за елитно место за живеење.
Филмот ги носи личните приказни и мислења на студентите, нивната борба за адаптација и изборот помеѓу храброста и стравот во една таква средина, а најтрагично е што студентите кои живеат таму молчат, се плашат и не се борат за своите права.
Филмот „Живот во движење“ на Игор Христов следи шест различни жонглери кои своето шоу го прават на семафорите во Санта Круз, главниот град на островот Тенерифе.
Овие уметници успеваат да најдат простор за изразување на едно нестандардно место, како што е центарот на улицата. Со својот перформанс тие ја прескокнуваат бариерата на капитализмот и во исто време ги развеселуваат луѓето наоколу.
Краткиот документарен филм „На точак“ на Горјан Атанасов ги открива моќта на велосипедот, проблемите на велосипедистите во Скопје и нивната борба за права и простор слободно да возат низ градот преку ненасилни активности и организирање на акцијата „Критична маса“.
Новото филмско остварување на аудиовизуелниот автор Александар Спасоски е со наслов „Бродот што никогаш не поминал“. Александар Спасоски ликовен автор и видео автор кој дипломира во Минхен 2008 нови медиуми и познат е како видео автор, композитор и ликовен уметник.
По номинацијата во Оберхаузен, на познатиот филмски фестивал во Германија во 2008 година, со видеото „Воајер“, Спасоски повторно во ова видео остварување, како и во „Воајер“, се занимава со феноменот на имагинативната реалност, егзистенцијализмот и односот на ликовниот автор визави елитизмот како бирократски систем кој авторската иницијатива ја игнорира поради силната западна бирократија во Германија. Но, воедно, и прави одлична паралела со нашиот локален систем на создавање нов град и нова историска имагинација.
„Бродот што никогаш не поминал“ е документарен ’мејкинг оф..‘ од она што Александар го поставил како звучна инсталација во 2012 во Скопје и во 2013 во Минхен.
Произведувајќи звук на бродска сирена на место каде што не се одвива воден сообраќај, тој сака да ја поттикне имагинацијата на публиката, која преку звучниот стимул ќе си визуелизира брод што поминува, но и да види како звукот ќе влијае врз оние кои се подалеку од реката.
Филмот е единствениот опиплив документ од ова еднодневно искуство кој на хумористичен начин го прикажува развивањето на проектот, тешкотиите со кои се соочил уметникот барајќи дозволи од институциите во Баварија и техничките предизвици при изградбата на конструкцијата. Проектот е финансиран од Министерството за култура на Република Македонија.
Филмската програма можете да ја следите на фестивалскиот веб-сајт http://makedox.mk/, на Фејсбук и Твитер, додека видеохрониките можете да ги следите на You Tube – Make Dox.
Шестото издание на Фестивалот на креативен документарен филм „МакеДокс“ се одржува од 20 до 26 јуни 2015 година, во Куршумли-ан и во Младинскиот културен центар во Скопје.
Фестивалот „МакеДокс“ и Патувачкото кино се поддржани од Националната фондација за демократија од Вашингтон, Агенцијата за филм на РМ и Делегацијата на ЕУ во Скопје.