Од 24 до 28 април во Битола, по 15-ти пат ќе се одржи интернационалниот „Фестивал на монодрама“ во организација на Центарот за култура од Битола.
На фестивалот ќе се прикажат претстави од Македонија, Словенија, Романија, Србија, Шведска, Украина, Тунис и од Израел, а ќе биде отворен со претставата „Изгубени Германци“ од Дејан Дуковски, во режија на Слободан Унковски.
Учесниците ќе се борат за наградата Гран-при, која ќе ја додели меѓународно стручно жири предводено од познатиот македонски актер Мето Јовановски.
-Она што можам да ветам е богата програма и во и вон конкуренција. При изборот на претстави најмногу држев до критериумот квалитет. Најважна секако е актерската игра и актерското мајсторство, но секако тука се и сценографијата, костимографијата, светлото и слично – изјави актерот Петар Мирчевски, селектор на фестивалот.
Фестивалот ќе го затвори Театар Комедија од Скопје со претставата „Женидба“ во режија на Дејан Пројковски. На фестивалот ќе бидат изведени 10 претстави во конкуренција, а 4 вон конкуренција.