Месец февруари и оваа година ќе биде одбележан како месец на ретките болести.
Од здруженијата „Ретко е да си редок“ и „Живот со предизвици“, по повод месецот на ретки болести ја изработија четвртата сезона од проектот „Ги запознаваме ретките болести“ преку која е достигата респектабилна бројка од 111 обработени дијагнози.
„Како новитет годинава е и официјалната веб страна на кампањата, на која се поместени сите податоци и материјали од претходнит кампањи. На овој начин ќе се продолжи континуитетот со запознавањето на општата популација со ретките дијагнози кој би довел до саканите ефекти на истиот“, велат од здружението „Ретко е да си редок“.
Целта на проектот е преку соодветни текстови, видео и аудио записи да се запознае јавноста со ретките дијагнози од кои заболуваат граѓаните во нашата земја. Проектот е од информативно едукативен карактер, а на него работеле професори и доктори од Детската клиника и Клиниката за Неврологија во Скопје .
„Со овој проект ќе ја подигнеме јавната свест со цел да ги доближиме проблемите и предизвиците со кои се соочуваат семејствата со ретки болести, до јавноста и институциите“, велат од Здружението.
Самуиловата тврдина во Охрид ќе биде осветлена цел месец февруари во знак на поддршка на пациентите кои се борат со ретки болести. Во боите на ретките болести ќе светнат и општинските згради на општините Охрид, Дебрца и Струга.