Толку ќе поделат играчите во составот на Благоја Милевски за пласманот на ЕП 2017 во Полска иако сумата може да биде и „подебела“  

 

„200.000 евра за пласман на Европско првенство“. Ова беше сумата што Фудбалската федерација на Македонија ја најави како награда по триумфот (1:0) над Шкотска во Единбург на почетокот на минатиот месец при евентуален успех на младата селекција во квалификациите. Истата сума е потврдена и по победата над истиот противник во Скопје синоќа со задржа дека може да не биде и конечна.
Неофицијално, Управниот одбор на ФФМ на првата наредна седница ќе одлучи за висина на премијата, односно, дали ќе останат овие 200.000 евра или ќе биде засилена.
Македонскиот национален тим за играчи до 21 година го освои првото место во квалификациската група 3 и стана прва „црвено-жолта“ фудбалска селекција што обезбедила пласман на Европско првенство. Составот на Благоја Милевски синоќа славеше над Шкотска со 2:0 како прв услов за исполнување на мисијата. Вториот беше кикс на Исланд на домашен терен што, исто така, се случи. Украина победи во Рејкјавик со 4:2 за општо задоволство во овдешната јавност.