Ѕвездата на Реал Мадрид, Кристијано Роналдо втора година со ред ја освои наградата „Најдобриот“ која што ја доделува ФИФА.
Португалецот во изминатата сезона го водеше својот тим до титулата во шпанската лига и Лигата на Шампионите, што беше доволно за титулата да отиде кај него, победувајќи ги финалистите Нејмар и Меси.
Роналдо постигна 25 голови во Ла Лига и 12 голови во Лигата на Шампионите минатата сезона.
„Им благодарам за сите кои го дадоа својот глас за мене, сметам дека Меси и Нејмар исто така заслужуваат да се на ова место. Мило ми е што фудбалските „оскари“ се во Англија за прв пат, а јас втора година во низа ја освојувам оваа награда. Им благодарам на фановите за поддршката низ сите овие години поминати заедно со „кралското“ семејство“, изјави Роналдо.
Наградата „Најдобриот“ ја доделуваат селекторите и капитените од сите репрезентации, како и новинар од секоја територија која што има национален тим, како и фанови од целиот свет кои гласаат преку интернет.
Напаѓачот на Арсенал, Оливие Жиру ја освои ФИФА Пушкаш наградата за најубав гол, тренерот на Реал Мадрид, Зинедин Зидан беше одликуван за тренер на годината, додека ветеранот од Јувентус, Џанлуиџи Буфон ја однесе наградата за најдобар голман.