Еден од членовите на резервниот тим на Клиниката за кардиологија пројавил симптоми на работното место. Случајот е забележан во делот на ангиосалата каде што нема лежечки пациенти, туку само пациенти кои доаѓаат за интервенција на срцето и во тој дел, лекарите во однос на контактот кон пациентите се целосно заштитени, изјави министерот за здравство Венко Филипче на денешната прес-конференција во Владата.
„Но, доколку се востанови дека некој се појавил на работно место свесен дека има симптоми, ќе следуваат санкции“, потенцира Филипче.
Анализата на материјалите од лица од Заводот за рехабилитација во Козле сè уште трае, а во меѓувреме се земени примероци од уште 18 вработени, истакна Филипче и во завнисност од резултатите, како што рече, постои можност од понеделник да работи за амбулансткиот дел во установата.
Филипче нагласи и дека не треба да се има сомнеж за несподелување на точни бројки во врска со бројот на заразени лица со Ковид-19 во земјата.
„Тие податоци ги споделуваме и со официјални претставници на Светската здравствена организација и не може да биде поинаку. Во тој поглед нема простор за манипулација“, нагласи министерот за здравство и изрази задоволство што растот на заболени е линеарен, а не експоненцијален.
Во изминатите 24 часа, рече тој, се регистирани 18 нови случаи со што вкупната бројка на заболени во земјата до 12 часот денеска е 219. Нови случаи се регистрирани кај лица од Скопје, од Прилеп, Куманово и Тетово. Според местото на живеење, случаи на Ковид-19 се забележани во Скопје, во Дебар, во Куманово, во Штип, во Прилеп, во Охрид, во Велес, во Кавадарци, во Тетово и во Гостивар. Тројца од заболени се излекувани, а тројца, за жал, починаа.
„На Инфективната клиника се хоспитализирани 41 пациент од кои седум во потешка состојба, но истите се независни од респиратор, 27 се наоѓаат во средно-тешки состојба, а седум имаат поблаги симптоми. Стабилна се состојбата и на пациентите во Штип“, порача Филипче.