Министерството за здравство ќе го чека ребалансот на буџетот за им го исплати заостанатиот надоместок на лекарите од Ало докторе, кои изминатите 10 месеци работеа без пари. Од Министерството за НОВА, потврдија дека ќе бидат обезбедени финансиски средства во рамки на расположливиот буџет.
„Министерството за здравство во рамките на расположливите средства на буџетот, презеде активности за изнаоѓање финанскиски средства за исплата на ангажираните лекари во Проектот – Ало докторе. По донесување на ребаланс на буџетот кој е во Собраниска процедура, Министерството за здравство ќе пристапи кон измена на соодветната Програма која треба да ја помине владината процедура и во текот на наредниот месец ангажираните лекари кумулативно ќе ги добијат средствата“,велат за НОВА во Министерството за здравство.
25 лекари специјалисти кои одговараат на телефонските повици на Ало докторе се уште не го добиле надоместокот за нивниот труд иако од ресорното Министерството им беше ветено дека финансискиот надоместок за периодот од 1 јануари ќе го добијат во октомври.
Како што веќе објави НОВА, станува збор за лекари од кои повеќето се специјалисти кои веќе четири години се ангажирани на проектот Ало докторе, воведен во време на поранешниот министер Тодоров. Лекарите кои се обратија во редакцијата на НОВА, тврдат дека од 31 декември минатата година работат без пари, дежураат преку ден и ноќе и сето тоа без надомест за кој склучуваат договор секој месец.
„ Ние работиме без пари 10 месеци, дежураме по 4, 6, 8 или 10 часа во дење и во текот на ноќта. Имаме неделно по 5000 јавувања. Но, ова со исплатата сите не направи да не веруваме дека нашата состојба ќе се реши и дека ќе ни бидат исплатени хонорарите. Не знаеме нити дали самиот проект ќе продолжи“, велат за НОВА лекарите кои се ангажирини на проектот Ало докторе.
Во Министерството за здравство работата на проектот Ало докторе ја сметаат за успешна бидејќи, како што велат, „граѓаните имаат бенефит, особено заради фактот дека голем дел од повиците ја релативизираат работата на службата за Итна Медицинска Помош, односно, со јавување на “Ало Докторе“ се решаваат дел од здравствените дилеми и прашања на граѓаните“.
Лекарите кои работат на проектот велат дека со јавување на граѓаните кои бараат совети им е олеснета работата на службата за Итна медицинска помош бидејќи тука, освен за здравствената состојба во моментот добиваат совети и како да постапат понатаму, во која болница да се обратат, како да го направат тоа.