Потврдата за вакцинацијата и ПЦР-потврдите, хартиените документи, се сосема доволни за влез во Грција. Од системот „Мој термин“ работат на една варијанта, модул, тој да се надгради и податоците да може да се стават во апликацијата, но граѓаните мора да знаат дека тоа не е никаков ограничувачки фактор, дека и сегашните документи што потенцијално ќе бидат скенирани во самата апликација им се сосема доволни за влез, истакна денеска министерот за здравство, Венко Филипче.
Тој рече дека тоа е само една дополнителна алатка со што европските земји ја шират мрежата на институции кои даваат соодветни документи и тоа е суштината на таа апликација.
За вакцините, Филипче потенцира дека сега има уште нешто помалку од 5000 дози кои се распределени во новоотворените пунктови, а во останатите се врши ревакцинација.
– Оваа недела треба да дојдат 70 илјади вакцини – 50 илјади од Бугарија и 20 илјади од Грција, најверојатно вакцини на „АстраЗенека“. Се уште немаме потврда за типот на вакцини, рече Филипче.
Редовно, секој понеделник пристигнуваат вакцини на „Фајзер“ и се очекува да стигне голема количина вакцини, за кои се уште нема точен датум, а биле најавени за почетокот на јуни.