Срцето на 44-годишната пациентка, чие семејство несебично ги донираше органите, рано утрово почна повторно да чука, наведе министерот за здравство, Венко Филипче во постот на неговиот Фејсбук профил, по четвртата успешна операција на трансплантација на срце во Македонија.
– Следните денови се критични. Да се надеваме дека телото ќе го прифати новиот орган. Пациент кој неколку години боледува од тешка кардиоваскуларна болест добива шанса за нов живот. Во изминатите 24 часа, околу 100-тина лекари, медицински сестри и болничари, работеа заедно како тим и покажаа како беспрекорно функционира здравственитот ситем, нагласи Филипче.
Во трансплантацијата на срце учествуваа тимови од Државната кардиохирургија предводени од проф. Сашко Јовев и од приватната болница Жан Митрев, предводени од академик Митрев, како и анестезиолозите од КАРИЛ на чело со др Маја Мојсова, Националниот координатор за трансплантација.
– Благодарност до колегите од сите клиники кои оваа долга ноќ работеа заедно со неверојатна посветеност. Здравствените работници се пример за тимска работа и соработка. За само една година имаме четири трансплантации што е неверојатен успех за македонското здравство, изјави Филипче.