Се менува Законот за лекови за да се отвори законска можност за именување на заменик директор во Агенцијата за лекови. Подносител на барањето за измени на законската регулатива е Министерството з а здравство, потврдија за НОВА од оваа институција.
Предлог -законот за изменување и дополнување на лекови и медицински помагала веќе е објавен на Енер на Влада, алатка преку која преку доставување предлози, мислења и забелешки можат навремено да се вклучат засегнатите страни во креирањето на регулативата.
„Да, точно е. Објавено е известувањето на Енер на Влада по што ќе оди на проценка на регулативата, па во Собраниска процедура“, потврдија за НОВА од кабинетот на министерот Филипче.
Во Предлог законот кој е доставен во Влада стои дека “од досегашното искуство во примената на Законот во делот на работата на директорот и функционирањето на Агенцијата се констатира дека, заради непостоење на заменик, во случај на отсуство на директорот, се јавува проблем во ефикасното вршење на работите“.
Во Агенцијата за лекови досега немало заменик директор. Извори од таму велат дека немало потреба за тоа бидејќи и да патува директорот на неколку дена , процедурите кои што вршат таму се долготрајни и не изискуваат никаква итност. Згора на се, Законот за организација и работа на органите на државната управа во член 52, став 3 и 4, предвидено е во отсуство на директорот тој да може избере заменик од редот на вработените.
„ Непотребно се прави ова. Законот и досега дозволуваше директорот да избере заменик од редот на вработените, во негово отсуство. Вака се создаваат непотребни трошоци, плата од околу 1000 евра, како и трошоци за стан и возило доколку заменикот не е од Скопје“, велат нашите извори.
Во јавноста веќе се шпекулира дека на повидок е политички договор, со кој директорското место на Агенцијата за лекови( МАЛМЕД) треба да припадне на БЕСА. Се спомнува името на Ќамил Ибраими од БЕСА, фармацевт и професор на Универзитетот во Тетово кој треба да биде назначен за нов директор, а негов заменик да биде сегашниот директор Роберт Бекироски кој е од СДСМ.
Во БЕСА за НОВА потврдија дека ова директорско место е дел од преговорите за влез во Владата, но велат дека не е конечно и не знаат дали воопшто ќе помине.
Од Министерството за здравство нема официјална потврда за ова, но и таму веќе се знае заради што се прави измената на Законот за лекови.
Инаку, Бекироски за кој наводно е наменето заменичкото не од Скопје и освен платата, за него ќе треба да се обезбедат средства за возило и стан.
НОВА пред четири месеци објави , дека Владата ја крие и професионалната биографија на Бекироски. Од таму сметаат дека тоа е личен податок чие откривање би значело повреда на заштитата на личните податоци. Ова е првпат CV на еден директор да биде личен податок и нешто што не треба да го знае јавноста. НОВА има сознанија дека Бекироски не ги исполнува условите за директор.