Утрово се сретнав со семејството на 40 годишната Јасмина, жената донор на срце и бубрези, која спаси три човечки животи. Немам зборови со кои може да ја опишам големината и човечноста на семејството Василковски кои во саботата во моменти на најголема болка, одлучи да ги донира нејзините органи. Јасмина беше мајка на 10 месечно бебе, посветена сопруга, добра сестра и снаа. Василковски се скромни луѓе, нивниот хуман и несебичен гест, никогаш нема да го заборавиме, остануваме поддршка и секогаш сме овде кога ќе треба да им се помогне, објави на својот Фејсбук профил министерот за здравство, Венко Филипче.

Во неделата на Клиниката за кардиохирургија беше извршена третата трансплантација на срце во историјата на нашата држава. Операцијата беше извршена врз 39 годишна жена, со вродена срцева маана, кoја подолго време чекаше донор. Тешката операција трaеше 5 часа.

Филипче денеска изјави дека состојбата на пациентката е стабилна и оти сите параметри се добри.

– Сите параметри кои произлегуваат од анализите направени до денес се добри и сите се во фаза на подобрување, така што очекувам дека денес може постепено да се ослободува од респираторната машина, изјави Филипче, одговарајќи на новинарски прашања по настанот на Универзитетската клиника за детски болести по повод Светскиот ден на детето.

Освен срцето, беа пресадени и бубрези од донорот и тоа кај 44-годишен маж кој беше на хемодијализа и кај 30-годишна жена која беше на перитонеална дијализа.  Двајцата пациенти на кои завчера им беа трансплантирани бубрези од починат донор се чуствуваат добро.