Владата на денешната седница треба да одлучи дали осумте возила од Министерството за земјоделие ќе може да ги преземе Министерството за здравство за да преадаптира во возила за итна медицинска помош. Ова денеска го потврди и министерот за здравство Венко Филипче.
„Прво треба возилата да се префрлат од владение на Министерството за земјоделство на Министерството за здравство. Станува збор за возила кои се во солидна состојба и нема да бидат теренски, туку само за транспорт на пациенти и тоа е таа мала пренамена што може да се направи. Ќе направиме постапка за да ги пренамениме сите возила за потребите на Итната медицинска помош, рече Филипче.
Пред речиси два месеца, Филипче изјави дека секторот за опрема треба да направи проценка дали осумте комбиња од Министерството за земјоделство можат да се адаптираат во возила за итна медицинска помош. Во јавноста тоа не се протолкува како мала промена, туку како сериозна намера комбињата кои не им требаат на Министерството за земјоделие, да служат како возила во кои ќе се пружа итна медицинска помош.
На прашањата на новинарите како планира да се адаптираат, кога возилата за итна медицинска помош треба да исполнуваат строги стандарди и не треба да има импровизации кога се човечки животи во прашање, Филипче тогаш со одговор:
„Имаат малку километри поминато изгледаат солидно, внатре имаат полици што може да се искористат. Така што, Секторот за опрема ќе ги види и ќе одлучат дали можат да послужат и да започне постапка за опремување. Ќе ви кажам кога ќе заврши процедурата колку тоа ќе чини, макар да треба и да се распише тендер, изјави Филипче на 20 март годинава.
Инаку, денеска министерот Филипче ги промовираше новите 12 возила на Итната Медицинска помош наменети за Скопје и за неколку градови во државата кои ги најави претходно. Тој истакна дека возилата се опремени со најсовремена медицинска опрема и со овие возила им се овозможува на пациентите да ја добијат неопходната здравствена услуга многу побрзо и поквалитетно.
„Во отворена и транспарентна постапка со огромна заштеда набавивме 12 возила за Итна медицинска помош. Шест од вкупно 12 возила се наменети за градот Скопје, додека пак останатите шест возила се наменети за Здравствен Дом Крушево, Здравствен Дом Кичево, Здравствен Дом Крива Паланка, Здравствен Дом Берово, Општа болница Струга и Општа болница Дебар“, рече денеска Филипче.