Концертниот филм „Андреа Бочели: Љубов во Портофино“ премиерно ќе биде прикажан на 8 март во 20:30 часот во киното Cineplexx во Скопје.
Публиката ќе има можност да ја доживее интимната и романтична атмосфера, која омилениот светски тенор ја направи за публиката на еден од најубавите плоштади на светот, Пјацета во Портофино.
На овој концерт, снимен во август 2012 година во продукција на наградуваниот продуцент Дејвид Фостер, Андреа Бочели ги отпеа убавите љубовни песни придружен од оркестар од 40 членови. Гости на оваа вечер беа германската ѕвезда Хелен Фишер, бразилската пејачка и текстописец Сенди, неговата вереничка Вероника Берти, како и виолинистката Керолајн Кембер и трубачот Крис Боти.
Филмот вклучува и ексклузивно интервју со Бочели, во кое гледачите можат да го слушнат неговото размислување за љубовта и романсата.
Филипо Шугар, претставник на италијанската куќа Sugar Music, за овој концертен филм изјавува: „Настап на најчудесниот тенор во таква интимна атмосфера на залезот на сонцето во Портофино е нешто што не смее да се пропушти.Филмот е единствено задоволство за широката публика, прилика да уживаат во најромантичните песни кои ги изведува најдобриот светски уметник, Андреа Бочели.“