На фестивалот на авторски и независни филмови „Санденс“, кој заврши синоќа во Парк Сити, во Јута, САД, свечено беа доделени главните награди.
Во категоријата на играни филмови победи дебитантското остварување „Fruitvale“ на режисерот Тајан Куглер, кој ги доби главните награди и од публиката и од жирито, а во категоријата на документарни филмови победи „Blood Brother“ „ на Стив Хувер.
Филмот „Fruitvale“ е базиран на вистинска приказна за Оскар Грант, млад Афроамериканец кој бил убиен од полицијата. Тој имал само 22 години и полицаец го застрелал во грб на железничката станица во Оукленд во Калифорнија.
-Се работи за филм вешто реализиран, има силен емотивен набој и силно морално и општествено актуелен. Филм за секој кој барем за секунда си помислил дека филмовите немаат никакво влијание и не можат да го променат светот, изјави Том Ротман, еден од членовите на жирито.
Режисерот кој Куглер изјави дека е лично врзан со приказната бидејќи има исто години како и неговиот главен лик и потекнува од исто место.
Документарецот „Blood Brother“ го следи младиот Американец Роки Брат кој се преселил во Индија за да им помага на децата заболени од сида.
Наградата за најдобро сценарио на игран филм ја доби Лејк Бел за дебитантскиот филм “In A World”, а наградата за режија и’ припадна на Џил Соловеј за филмот „Afternoon Delight“.
На годинашниот „Санденс“ учествуваше и српскот филм „Кругови“ на Срѓан Голубовиќ.
Основач на фестивалот „Санденс“ е Роберт Редфорд, а прв пат се одржал во 1978 година. Минатата година го посетиле повеќе од 50 илијади посетители и е најголем фестивал на независен филм во САД. На „Санденс“ учествувале голем број, денес, најпознати режисери во светот.