Денеска на интернет страната на општина Штип објавен е оглас за продажба на фудбалскиот клуб Брегалница. Одлуката за продажба е потпишана од градоначалникот Илчо Захариев кој е и иницијатор за отуѓување на клубот кој е 100 отсто во сопственост на општината.
Според јавниот повик, на продажба се нудат сите 250 акции, односно клубот ќе го купи еден сопственик кој ќе даде најдобра понуда. Вкупната вредност на акциите е 25.000 Евра, односно100 евра по акција.
Во огласот пишува дека „Продажбата на акциите ќе се изврши по пат на јавно наддавање со поднесување на затворени понуди“.
Право на учество на јавниот повик имаат домашни и странски правни и физички лица, а основен критериум за избор на најповолна понуда ќе биде највисокиот понуден износ на минимум-годишно вложување за временски период од 10 години, при што понудениот износ не може да биде понизок од 300.000 евра годишно.
НОВА пред два дена објави дека целиот процес на продажба на Брегалница е сомнителен и нетранспарентен. Првичната намера беше клубот да се продава на јавен повик, па потоа по реакција на советниците од СДСМ беше одлучено акциите на Брегалница да одат на берза. Но, сепак Захариев се одлучи за продажба на јавен тендер со понуди во затворен плик.
Јавното отворање на понудите ќе се изврши на 03.10.2016 година во 11:00 часот во просториите на Општина Штип.
Како што објави НОВА, постојат информации дека клубот му е ветен на турски бизнисмен и дека огласот ќе биде само формалност. Овие неофицијални информации ги подгреа доаѓањето на тренерот од Турција Јиксел Јесилова која на крајот на август, заедно со своите помошници пристигна во Штип за да го испитал теренот и кондицијата на клубот.
Извор во општината за НОВАТВ вели дека непозната маркетинг агенција од Турција веќе купува и странски играчи. Донесени се пет странски играчи, а парите за играчите се уплатени од извесна маркетинг агенција со назив „Reflex Menajerlik Sportif Faaliyetler“ и седиште во Турција.
НОВА истражува кој навистина стои зад продажбата на Брегалница, клуб кој секоја година едвај опстојува во Првата лига и кој секоја година ја завршува со негативна сметка од 30 до 50.000 евра.