Ураганот Ирма, кој се засили и премина во бура од 4 категорија, се очекува неделава да ги зафати Карибите и можеби копното на САД кај Флорида.
Според Националниот центар за урагани, во Атлантскиот Океан забележани се повеќе бури, метеоролозите велат дека први што би го почуствувале урадот се Порторико и другите Карипски острови и тоа до крајот на денот.
Иако точната патека на Ирма се уште е неизвесна, неколку острови на Карибите, како и на Флорида, се подготвуваат за невремето.
По прогласувањето на вонредна состојба низ цела Флорида, гувернерот Рик Скот рече дека претседателот Доналд Трамп “понудил целосни ресурси на федералната влада, бидејќи жителите се подготвуваат за ураганот Ирма”.
И во Порторико, полиците за храна и вода за пиење се празни, откако и гувернерот на Порторико, Рикардо Росело, прогласи вонредна состојба и ја активираше Националната гарда во понеделникот.
Луѓето со часови чекаат пред продавниците за алати за да купат резерви на батерии и генератори. Жителите на Порторико стравуваат дека по Ирма, ќе бидат потребни недели или месеци за враќање на животот во нормала.
Освен Порторико и во низа други карипски острови на сила е предупредување за урагани, вклучувајќи ги британските и американските Девствени Острови, Антигва, Барбуда, Ангила, Монтсерат, Сент Китс, Невис, Саба, Сент. Мартин и други.
Предупредувањата обично се издаваат во области каде што може да има “ветрови со тропска бура” до 140 км /ч во времетраење од околу 36 часа откако алармот ќе стапи на сила.