Во просториите на галеријата на Младинскиот Културен центар во Скопје, вечерва своја изложба со почеток во 21:00 часот, ќе претстави Марија Божиновска Џонс, насловена „Фолкотека 2.0“.
Изложбата на Џонс, веќе беше претставена пред граѓаните на Норвешка, како дел од „B open“ во Берген. Меѓутоа изложбата во Скопје ќе биде надополнета со дело изработено во соработка со хорот Распеани Скопјани.
ФОЛКОТЕКА 2.0 е колекција на повеќе видеа кои користат интернет како извор за пронаоѓање на материјал во форма на видео снимки, постирани текстови и аватари на турбофолк фанови, кој е позајмен за изработка на клиповите, воедно потенцирајки го просумеризмот, приватноста и анонимноста во сајбер просторот.
Во склоп на изложбата ќе бидат прикажани продуцирани видеа посветени на најголемите турбофолк авторки како на пример Сека Алексиќ во “Фолкотека микс” и Цеца во “Нет самогласки”, додека преку караоке видеата ќе бидат презентирани текстовите на неколку популарни нумери на англиски јазик, чија содржина е продуцирана од „позајмени” oнлајн аватари на турбофолк фанови и нивни, во најголем случај неуспешни преводи, притоа автентично задржувајки ги дури и граматичките грешки.
Фолкотека 2.0. е претставена како повеќеслоен портрет на турбофолк феноменот во едукативна медиска библиотека којашто ѝ помага на интернационалната публика да го опфати политизираниот музички жанр од Балканот.
Библиотеката се состои од онлајн видеа и друг материјал прикачен од нивните обожаватели во различни форми: снимки од мобилни телефони, од концерти во живо, ВХС снимки на постари ТВ емисии, сега аплоадирани онлајн, ре-интерпретации на омилени песни изведени во дневна соба, како и преводи на песните на англиски, неуспешни во повеќето случаи.