Фелипе Маса (36) ќе замине во пензија по завршување на тековната сезона во Формула 1 шампионатот. Бразилскиот ас лично ја соопшти одлуката за повлекување од „летечкиот циркус“ во пресрет на последните две трки во 2017 година во неговата родна земја (10-12 ноември) и во Абу Даби (24-26 ноември). На таков чекор беше решен и лани, но реши да се врати во Вилијамс по трансферот на Валтери Ботас во Мерцедес.
„Останав и оваа сезона во Формула 1 само да помогнам на тимот на Вилијамс. Мојата кариера е дојдена до крај. Уживав сите овие години наназад, сега е време да заминам. Двете трки до крајот ќе бидат емотивни за мене“, изјави бразилскиот пилот кој има 267 старта, 41 пласман на подиум, 16 пол-позиции и 11 победи во кариерата.
Маса беше на најблиску до титула во 2008 година како возач на Ферари. Конечната победа ја загуби во последната трка во која Луис Хамилтон го освои петтото место што значеше и бод повеќе за Британецот во однос на Бразилецот на генералниот пласман. Покрај за тимот од Маранело и за Вилијамс, во кариерата управуваше и со болидите на Заубер.