Луис Хамилтон ќе ја предводи колоната болиди и во утрешната трка за ГН на Мексико, 19-та во годинашната сеозна во Формула 1 шампионатот. Британскиот пилот на Мерцедес вечерва извозе најбрз круг во квалификациите на патеката „Ерманос Родригез“ и обезбеди привилегија да стартува од пол-позицијата.
Времето што Хамилтон го оствари беше 1:18,704 минути или 0,254 секунди подобро од Нико Розберг. Британецот заостанува 26 бода во однос на неговиот клупски колега од Германија во пресрет на натпреварот на мексиканскиот асфалт. Розберг би можел уште утре да ја прослави првата титулата во кариерата под услов да победи, а Хамилтон да не освои ниту еден бод.
Трет резултат во квалификациите забележа Макс Ферстапен, од вториот ред, покрај него, ќе тргне и Даниел Рикијардо. Потфрлија возачите на Ферари. Кими Раиконен ќе почне како шест, а Себастјан Фетел од седмото место.
Трката за ГН на Мексико е утревечер од 20 часот на патеката што е на 2.200 метри надморска височина.